Буяны ажил зохион байгуулах жагсаалт: идээ, цайллага, зэд, талархал

Буяны ажил урьдчилан төлөвлөгддөггүй. Гэнэт ирдэг, тэгээд хэдхэн хоногийн дотор олон зүйлийг зэрэг шийдэх хэрэгтэй болдог — сэтгэл хамгийн хүнд байх тэр үед.

Энэ жагсаалт бүх зүйлийг заахгүй. Ёслолын нарийн дэг нутаг, айл бүрт өөр. Харин мартагдах эрсдэлтэй ажлуудыг нэг дор харуулахыг зорьсон.

1. Хэдэн хүн ирэх вэ?

Хамгийн түрүүнд шийдэх зүйл, учир нь газар, идээ, зэд бүгд үүнээс шалтгаална. Хүнээр биш айлаар тоол: мэдэгдсэн айлын тоог 1.5-аар үржүүлээд 10–15% нөөц нэм. Тооцооны дэлгэрэнгүй.

2. Цайллагыг хаана хийх вэ?

Гэртээ хийх үү, газар түрээслэх үү. Хотод буяны цайллагын үйлчилгээтэй ресторан олширсон — ширээ засал, үйлчлэгчийг нь хариуцдаг. Захиалахдаа дараахыг асуугаарай:

• Хэдэн хүний суудалтай вэ
• Цагаан идээ, боовоо өөрсдөө авчирч болох уу
• Хаалганы ойролцоо зэд гардуулах ширээ тавих зай бий юу

3. Идээ, цайллага

Энэ асуултад интернэт хариулж чадахгүй. Зарим нутагт цагаан идээ, боов голлодог бол зарим айл халуун хоол засдаг. Гэр бүлийнхээ ахмад хүнээс асуу — энэ бол хамгийн найдвартай эх сурвалж.

4. Зэд

Ажил дуусахад ирсэн хүн бүрд гардуулдаг зэд ихэвчлэн хамгийн сүүлд санагддаг — тэгээд л яардаг. Тиймээс эхний өдөр нь захиалчихаарай.

• Тоо: ирэх хүнээс 10–15% илүү.
• Бүрдэл: сондгой тоогоор, ихэвчлэн 5 зүйл. Лаа, саван, цай голлодог.
• Баглаа: зочин гарахдаа нэг гараар авдаг тул бариултай уут хайрцгаас эвтэйхэн.
• Хүргэлт: хаана, хэдэн цагт хэрэгтэйгээ урьдчилан хэл.

Манай 5 төрлийн багц 13,000₮-өөс эхэлнэ. Улаанбаатарт үнэгүй хүргэж, орон нутагт унаанд тавьж өгдөг.

5. Хөрөг зураг

Талийгаачийн хөрөг зургийг ихэвчлэн хүрээнд хийж, хар туузаар чимдэг. Сайн зураг олдохгүй бол гэр бүлийн гэрэл зургаас томруулж хэвлүүлж болно — яаралтай хэвлэдэг газар олон бий.

6. Талархлын үг

Ажлын төгсгөлд эсвэл дараа нь сошиал сүлжээгээр ирсэн хүмүүстээ талархал илэрхийлэх нь түгээмэл. Жишээ нь:

«Бидний гашуудлыг хуваалцаж, ээжийн маань буяны ажилд ирж, сэтгэлээр дэмжсэн та бүхэндээ гүн талархал илэрхийлье.»

«Хүнд үед маань хажууд байсан ах дүү, найз нөхөд, хамт олондоо баярлалаа. Та бүхний сэтгэлийг бид мартахгүй.»

7. Дараагийн буян — 7 хоног, 49 хоног

Анхны ажлын дараа долоо хоног, дөчин есөн хоногийн буян үйлддэг. Зарим айл хорин нэг хоногийг ч тэмдэглэдэг. Эдгээрт ирсэн хүмүүст мөн адил зэд гардуулдаг заншилтай.

Анхны захиалга өгөхдөө эдгээр огноог хэлчихвэл бид тоо ширхэгийг нь урьдчилан бэлдэж өгнө. Санаа зовох нэг зүйл багасна.

Хамгийн чухал нь

Бүх зүйлийг ганцаараа бүү үүр. Хүний тоо, зэд, хоол, унаа гээд ах дүү, найз нөхөддөө нэг нэг ажил хуваарилаад өг. Гашуудлын үед хүмүүс туслахыг хүсдэг — зүгээр л юуг нь хийхээ мэддэггүй.